વાત માંડી છે હજુ, અંજામ લઈને આવ મા,
જીતવા તો દે મને, ઇનામ લઈને આવ મા;
આ નગરની હર ગલી શોખીન સન્નાટાની છે,
શબ્દને તું આમ ખુલ્લેઆમ લઈને આવ મા;
ક્યાંય સુકાયા નથી કોઈ આંખના દરિયા હજુ,
હોઠ પર 'શ્રી રામ' કે 'ઇસ્લામ' લઈને આવ મા;
જિંદગી આખી વિતાવી ભૂલવામાં જેમને,
એમની તસ્વીર, એનું નામ લઈને આવ મા;
હું હળાહળ ઝેરને પીવા મથું છું ક્યારનો;
દોસ્ત! અત્યારે છલકતું જામ લઈને આવ મા;
: હિમલ પંડ્યા
No comments:
Post a Comment